Државниот секретар во Министерството за култура, Бехиџудин Шехапи, синоќа во Струга се обрати на свеченото затворање на второто издание на фестивалот на театри „Тука фест“. Театарскиот фестивал траеше шест дена и собра познати актери од Албанија, меѓу кои присутни беа и: Маргарита Ѓепа, Роберт Дреника и Ујка Мујо; потоа Тинка Курти и Енвер Петровци од Косово и Бајруш Мијаку и Рафет Абази од Република Македонија.
Државниот секретар им посака многу успех и плодна соработка на сите присутни уметници, при што во својот поздравен говор им се заблагодари на директорот на фестивалот Џељадин Пошка и на уметничкиот директор Ољса Пошка, кои за кратко време успеале да подготват квалитетна програма и успешен фестивал.
Министерството за култура и во иднина ќе продолжи да ги поддржува ваквите културни настани, чија цел е афирмација на театарската уметност не само во Република Македонија, туку и пошироко, а со тоа стимулирајќи ја и регионалната соработка со земјите од нашето соседство.
